ပန်းချီကားအား ခံစားကြည့်ခြင်း
ပန်းချီကား
ကင်းဘတ်စအပေါ် ဆေးအစက်စက်တို့
စွန်းထင်း
အရောင်ဆိုးခြင်း မည်သတဲ့လား?
အနုပညာမှော်အောင်ခြင်း အတွက်
ငါ့ဝိညာဉ်အား စတေးခြင်း တစ်ရပ်
ဖြစ်တယ်။
သည်ပန်းချီကားမှာ
အနီရောင် အတွက်
ငါ့သွေးတို့ ရောစပ်ခဲ့တယ်
သည်ပန်းချီကားမှာ
အချစ်သင်္ကေတအဖြစ်
ဓားတစ်လက် ထည့်သွင်းခဲ့တယ်။
သည်ပန်းချီကားမှာ
မျက်ရည်များ အတွက်
ငါ့ နေ့ ည တွေ
ခင်းကျင်းခဲ့တယ်။
သည်ပန်းချီကားမှာ
ပန်းပွင့်များ အတွက်
ငါ့ရင်ဘတ် ဟင်းလင်း
ဖွင့်ထားခဲ့တယ်။
သည်ပန်းချီကားမှာ
ဆာလောင်ခြင်း အတွက်
ငါ့ဘ၀ကို ထိုးစိုက်ခဲ့တယ်။
လေရှုးသုန်သုန် တိုက်စေတော့
လေထန်ကုန်းလည်း ရောက်ခဲ့ပြန်တယ်။
သည်ပန်းချီကားထဲ. . .
ဟိကလစ်က ကတ်သရင်းကို
အ၀ါရောင် ပန်းတစ်ပွင့်ပေးလို့
ရိုမီယိုက ဂျူးလိယက်ကို
သူစိမ်းဆန်ဆန်
ဆက်ဆံလို့ပေါ့ ။
ဘ၀ဆိုတာ တိုတိုလေးပါတဲ့။
သည်ပန်းချီကားက
ဘ၀ကို ဘ၀နဲ့
လက်ဆင့်ကမ်းလို့
မျက်ရည်ကို မျက်ရည်နဲ့
တုန့်ပြန်ပြလို့
ရသမြောက်မှုတစ်ခုမှာ
အသည်းနှလုံးတို့ ပျက်သုဉ်းကြွေကျ
ဉာဏ်ပညာတို့ အကွပ်မဲ့ခဲ့ကြတယ်။
သရုပ်မှန်ဝတ္ထုတစ်ပုဒ်လို
သည်ပန်းချီကားဟာ
အိပ်မက်တစ်ခုရဲ့ သတ်သေခြင်း
ကြိုးတစ်ချောင်းရဲ့ နိဂုံး
မိုက်မဲခြင်းရဲ့ သန်းခေါင်ယံ
စည်းအပြင်က လူတစ်ယောက်
လွင်တီးခေါင်က တယောသံ
အဆုံးသတ်တိုင်းရဲ့ အဆုံးသတ်
အနုပညာ မှော်အောင်ခြင်းတစ်ရပ်
ဖြစ်တယ်။
ငါ၏ ပုံတူကားချပ်လည်း
ဖြစ်စေတယ်။
မှတ်ချက် နှင့် လက်မှတ်မှာ
လေးလေးနက်နက် သေသေသပ်သပ်
ရေးထိုးခဲ့ပါတယ်။ ။
No comments:
Post a Comment